Бишкек, 24.07.26. /Кабар/. Агартуу министрлигинин жетекчилиги Корея Республикасынын "Lambino" IT компаниясынын башкы директору Ли Су Ёнг менен жолукту.
Ведомстводон маалымдашкандай, анда билим берүү тармагын санариптештирүү боюнча кызматташуу мүмкүнчүлүктөрү талкууланды.
Министрдин биринчи орун басары Мухтарбек Баймурзаев өлкөдө жүргүзүлүп жаткан билим берүү реформалары, бирдиктүү санариптик билим берүү экосистемасы жана бардык аймактарда заманбап тестирлөө борборлорун түзүү иштери тууралуу маалымат берди.
Өз кезегинде Ли Су Ёнг компания санариптик трансформациянын багыттарын иштеп чыгуу, педагогдорду окутуу, IT боюнча онлайн лекцияларды даярдоо жана башка долбоорлорду биргелешип ишке ашырууга кызыкдар экенин билдирди.
Жолугушуунун жыйынтыгында тараптар сунуштарды кароону жана билим берүү тармагындагы кызматташууну улантууну макулдашты.
