Бишкек, 11.09.26 /Кабар/. Хайнань аралындагы Хайкоу шаарында Бишкек шаары менен Кытайдын Санья курорттук шаарынын ортосунда түз аба каттамын ачуу маселеси боюнча жумушчу жолугушуу болуп өттү.
Кыргыз тараптан сүйлөшүүлөргө «Кыргызстан аэропорттору» ААКтын коммерция боюнча директору Аман Мамаев катышты. Жолугушуу Кыргыз Республикасынын Кытай Эл Республикасындагы Элчилигинин жана Кыргызстандагы ШКУ өлкөлөрү үчүн аймактык долбоорлорду коштоо борборунун колдоосу менен өттү.
Кытай тараптан сүйлөшүүлөргө Хайнань провинциясынын ККП комитетинин катчысы Фэнь Фэй баштаган делегация катышты.
Жолугушуунун негизги темасы 2026/2027-жылдардын кыш мезгилине пландаштырылып жаткан Санья – Бишкек – Санья түз авиакаттамын ишке киргизүү болду.
Жолугушуу Бишкекте өткөн ШКУ саммитинин алкагында Кыргыз Республикасынын Президенти Садыр Жапаров менен Кытай Эл Республикасынын Төрагасы Си Цзиньпиндин эки өлкөнүн, анын ичинде транспорт жана туризм тармагындагы кызматташтыгын мындан ары чыңдоо боюнча сүйлөшүүлөрүндө жетишилген макулдашуулардын практикалык уландысы болду.
Санья – Хайнань аралынын түштүгүндө жайгашкан курорттук шаар жана Кытайдагы эң популярдуу туристтик багыттардын бири. Шаар тропикалык климаты, деңиз жээгиндеги курорттору жана пляждык эс алуусу менен белгилүү болуп, жыл сайын көптөгөн туристтерди өзүнө тартат.
