Бишкек, 21.07.26. /Кабар/. Кыргызстандын математика боюнча улуттук курама командасы Кытайдын Шанхай шаарында өткөн эң абройлуу 67-эл аралык математика олимпиадасында (IMO) тарыхый ийгиликти кайталады.
Агартуу министрлигинен билдиришкендей, дүйнөнүн 117 өлкөсүнөн 666 окуучу катышкан таймашта кыргызстандык окуучулар 3 күмүш, 2 коло медаль жана 1 Ардак грамота утуп алышты.
Бул жыйынтык менен Кыргызстан 35-орунду ээлеп, катары менен үчүнчү жыл дүйнөдөгү эң күчтүү 40 команданын катарына кирди.
Медаль уткандар:
- Акимов Ари – күмүш медаль ("Газпром Кыргызстан", 8-класс)
- Саят Арлан – Күмүш медаль ("Газпром Кыргызстан", 8-класс)
- Бобрус Ян – күмүш медаль ("Газпром Кыргызстан", 10-класс)
- Мусаходжаев Султан – коло медаль ("Маариф", 10-класс)
- Акенеев Тимур – коло медаль ("Газпром Кыргызстан", 11-класс)
- Абдувалиев Бектен – Ардак грамота ("Силк Роуд Эдюкейшн", 8-класс)
Кыргызстан бул олимпиадага 1993-жылдан бери катышып келет жана жалпы 27 медалга ээ болгон. Өзгөчө белгилей кетчү нерсе – анын 14 медалы акыркы 3 жылда утуп алынган. Агартуу министрлиги жаш математиктерди, алардын устаттарын жана ата-энелерин бул чоң жеңиши менен куттуктады!
