Бишкек, 12.05.26 /Кабар/. Транспорт жана коммуникациялар министри Талантбек Солтобаевдин жетекчилиги астында өткөн аппараттык жыйында жол инфраструктурасын жакшыртуу жана сел коопсуздугунун алдын алуу маселелери талкууланды.
Ведомстводон маалымдашкандай, жыйындын жүрүшүндө министр туристтик сезондун жакындап калганына байланыштуу, эс алуу жайларына баруучу жолдордун тизмесин тактап, аларды ыкчам жана сапаттуу оңдоп-түзөөдөн өткөрүүнү катуу талап кылды.
Стратегиялык Түндүк – Түштүк альтернативдик жолун ачууга карата бардык даярдыктарды көрүү жана курулушту аягына чыгаруу иштерин тездетүү милдеттендирилди.
Ошондой эле жаанчыл аба ырайына байланыштуу “Кыргызавтожол” ишканаларына жаратылыш кырсыктарын алдын алуу боюнча чукул чараларды көрүү, аймактарда асфальт-бетон заводдорун ыкчам түрдө ишке киргизип, пландык жумуштарды баштоо белгиленди.
"Каратай" пунктундагы унаалардын тыгынын жоюу жана көзөмөлдү иретке келтирүү маселеси көтөрүлдү.
Министр жол курулушунда убакытты уттурбоо жана ар бир чакырымдын сапатына жоопкерчиликтүү мамиле кылуу керектигин эскертти. Учурда республика боюнча жол салуу иштерин эртелетүү үчүн бардык ресурстар тартылууда.
