Бишкек, 07.04.26. /Кабар/. Чүй облусундагы “Ак-Тилек” жана Талас облусундагы “Чоң-Капка” көзөмөл-өткөрүү пункттарында кызмат өтөгөн инспекторлор атайын төшкө тагылчу камералар менен камсыздалды. Бул тууралуу Транспорт жана коммуникациялар министрлигинен билдиришти.
Маалыматка ылайык, Жерде жүрүүчү жана суу транспорту департаменти тармактагы коррупциялык тобокелдиктерди жоюу максатында кызматкерлердин ишмердүүлүгүнө заманбап технологияларды киргизүүдө. Бул транспорттук көзөмөл процессин толугу менен санариптештирүүгө багытталган.
Камералар кызматкердин иш убактысын, айдоочулар менен болгон байланышын жана текшерүү процесстерин үзгүлтүксүз видеого жаздырып турат. Бардык маалыматтар борбордук серверге онлайн режиминде өткөрүлүп, көзөмөлдөнөт.
Видеокөзөмөлдүн болушу кызматкерлердин да, айдоочулардын да мыйзамсыз аракеттерди жасашына бөгөт коёт. Ошондой эле талаштуу кырдаалдар жаралса, видеожазуулар объективдүү далил катары колдонулуп, жарандардын укуктарынын корголушун камсыздайт.
