Бишкек, 24.03.26. /Кабар/. Бишкектеги түндүк айланма унаа жолун масштабдуу реконструкциялоо долбоорунун алкагында эки стратегиялык багыт боюнча курулуш иштери активдүү уланууда.
Транспорт жана коммуникациялар министрлигинен билдиришкендей, бүгүнкү күндө иштер Алматы – Бишкек – Ташкент жана Бишкек – Нарын – Торугарт тилкелеринде жүргүзүлүүдө. Анын ичинде Нооруз дарыясындагы көпүрөдө өтмөк плиталарын монтаждоо жана каналдагы көпүрөдө бекемдөөчү устундарды орнотуу иштери жыйынтыкталып, жолдун негизин түзүүгө даярдыктар көрүлүүдө.
Ошондой эле жол жээгиндеги бак-дарактарды кыюу, аймакты тазалоо жана жараксыз материалдарды сыртка ташуу иштери аткарылып жатат.
Реконструкция учурунда айдоочуларга ыңгайсыздык жаратпоо үчүн негизги жолдогу чуңкурларды жамоо жана суу өткөрүүчү түтүктөрдү орнотуу иштери катар жүргүзүлүүдө. Курулуш аянтында иштин ыргагын камсыз кылуу үчүн 537 жумушчу жана 243 атайын техника тартылган.
"Реконструкциялоо иштери бекитилген графикке ылайык так жүрүп жатат. Бул долбоор аяктагандан кийин аймактагы транспорттук логистиканы жакшыртып, жол коопсуздугун жаңы деңгээлге көтөрөт", — деп айтылат маалыматта.
Долбоордун негизги максаты жолдун өткөрүү жөндөмдүүлүгүн жогорулатуу жана тилкелердин санын 6га чейин кеңейтүү. Ар бир тилкенин туурасы 3,75 метрди түзөт.
