Бишкек, 18.03.26. /Кабар/. Күн мурун тышкы иштер министри Жээнбек Кулубаев Кыргызстандагы дипломатиялык миссиялардын башчылары жана эл аралык уюмдардын өкүлдөрү үчүн ооз ачар уюштурду.
Ведомстводон маалымдашкандай, иш-чарага ошондой эле Кыргыз мусулмандарынын дин башкармалыгынын жетекчилиги, православ жана католик конфессияларынын дин кызматкерлери катышты.
Кулубаев конокторду ыйык Орозо айы менен куттуктап, анын руханий тазалануунун, боорукерликтин жана жалпы адамзаттык баалуулуктарды бекемдөөнүн мезгили катары маанисин белгиледи. Орозонун принциптери катары эсептелген сабырдуулук, тилектештик жана адилеттүүлүккө умтулуу заманбап дипломатиянын милдеттерине шайкеш келип, өлкөлөр ортосундагы ишенимди чыңдоого өбөлгө түзөрүн айтты.
Ошондой эле ал эл аралык коомчулуктун күч-аракеттерин бириктирип, дүйнөдө болуп жаткан жаңжалдарды тынчтык жолу менен, жалаң гана саясий-дипломатиялык ыкмалар аркылуу жөнгө салуунун маанилүүлүгүн да белгиледи.
