Бишкек, 18.12.25. /Кабар/. Бүгүн Ички иштер министрлигинде Жол кыймылынын коопсуздугун камсыздоо башкы башкармалыгына, ыкчам кызматтарга, ошондой эле Ысык-Көл, Нарын облустарынын жана Бишкек шаарынын Туристтик милициясына жаңы кызматтык унааларды жана карда жүрүүчү техникаларды тапшыруу аземи болуп өттү.
ИИМден билдиришкендей, иш-чаранын алкагында «JAC», «Changan», «Hyundai Staria», «Toyota Hiace», «Geely Atlas», «Chevrolet Cobalt», «Нива Legend» үлгүсүндөгү 50 жаңы кызматтык унаа, ошондой эле 5 карда жүрүүчү техника (снегоход) тапшырылды. Бардык унаалар заманбап техникалык жабдуулар менен толук камсыздалган.
Өз сөзүндө Улан Ниязбеков коомдук тартипти, жол кыймылынын коопсуздугун камсыздоо, иштин натыйжалуулугун жогорулатуу жана жарандарга көрсөтүлүүчү сервистик кызматтарды жакшыртуу максатында ички иштер органдарынын материалдык-техникалык базасын чыңдоого өзгөчө көңүл бурулуп жатканын белгиледи.
Ошондой эле министр өлкө аймагында жол кырсыктарынын санын азайтуу багытында иштер күчөтүлүп жатканын айтып, жаңы кызматтык унаалар бул максаттарды ишке ашырууда маанилүү роль ойной турганын кошумчалады.
