Кыргызстан — светтик мамлекет
Өлкөдө диний бирикмелер мамлекеттен бөлүнгөн жана мыйзамдар диний нормалардан жогору турат. Мындай шартта мамлекеттик саясат диний конфессиялардан көз карандысыз жүргүзүлүп, ар бир жаранга дин тутуу эркиндиги кепилденет.
Кыргызстанда диний салттар менен Конституциянын талаптарынын ортосундагы тең салмактуулук мыйзамдарды так сактоо, диний уюмдарды милдеттүү түрдө каттоо, диний маалыматтарга экспертиза жүргүзүү жана калк арасында түшүндүрүү иштерин үзгүлтүксүз алып баруу аркылуу камсыздалат. Бул тууралуу Кыргызстан мусулмандарынын дин башкармалыгынын аппарат жетекчиси Жоробай ажы Шергазиев “Кабар” агенттигине билдирди.
Анын айтымында, диний салттар менен Конституциянын талаптарынын ортосундагы тең салмактуулук мыйзамдарды так сактоо, диний уюмдарды милдеттүү түрдө каттоо, диний адабияттарга экспертиза жүргүзүү жана калк арасында түшүндүрүү иштерин алып баруу аркылуу камсыздалат.
“Кыргызстан — светтик мамлекет. Бул Конституцияда бекитилген. Диний ишмердүүлүктүн укуктук негиздери тиешелүү мыйзамдар менен жөнгө салынат. Кыргызстанда кабыл алынган диний нормалар жана салттар Конституцияга жана өлкөнүн мыйзамдарына каршы келбеши керек”, — деди Жоробай ажы Шергазиев.
Диний уюмдар каттоодон өтүшү керек
Жоробай ажы Шергазиев белгилегендей, диний бирикмелер мамлекеттен бөлүнгөн жана өз ишин уставдарынын негизинде, мыйзам талаптарын сактоо менен жүргүзөт. Диний ишмердүүлүк менен алектенүү үчүн алар мамлекеттик каттоодон жана эсептик каттоодон өтүшү зарыл.
Бул талап медреселерге жана башка диний билим берүү мекемелерине да тиешелүү. Ошондой эле өлкөдө соттук көзөмөлдүн системасы иштеп, диний адабияттар жана башка материалдар тиешелүү экспертизадан өткөрүлөт.
Мындай иштер экстремисттик мүнөздөгү же мыйзамдарга каршы келген материалдардын жайылышына жол бербөөгө багытталган.
Анын айтымында, Кыргызстанда диний нормалар менен Конституциянын ортосундагы тең салмактуулук биринчи кезекте мыйзамдуулук, экспертиза, жөнгө салуу жана көзөмөл аркылуу камсыздалат.
Дин тутуу эркиндиги боюнча түшүндүрүү иштери жүргүзүлүүдө
Жоробай ажы Шергазиев калк арасында түшүндүрүү иштерин жүргүзүүнүн маанилүүлүгүн да белгиледи. Анын айтымында, жарандарга светтик мамлекеттин принциптери менен бирге дин тутуу эркиндигине берилген укуктар тууралуу маалымат берүү зарыл.
Бул багыттагы иштер тегерек столдордо, коомдук угууларда, жолугушууларда жана жарандар менен консультацияларда жүргүзүлөт. Дин башкармалыгы мектептер жана жогорку окуу жайлары менен да кызматташат.
Мындан тышкары, медреселерде жана Дин башкармалыгынын системасындагы башка билим берүү мекемелеринде мыйзам талаптары, дин тутуу эркиндиги жана коомдогу тынчтыкты сактоо боюнча түшүндүрүү иштери жүргүзүлөт.
“Биздин негизги максатыбыз — Кыргызстанда тынчтыкты сактоо. Ошондуктан адамдарга светтик мамлекеттин принциптерин да, дин тутуу эркиндигинин кепилдиктерин да түшүндүрүү маанилүү”, — деди ал.
Радикалдык жана экстремисттик идеялардын алдын алуу
Жоробай ажы Шергазиевдин айтымында, Дин башкармалыгы диндин негиздерин туура түшүндүрүүгө жана радикалдык, экстремисттик идеялардын жайылышына жол бербөөгө өзгөчө көңүл бурат.
Бул багыттагы иштер жазык-аткаруу тутумунун мекемелеринде да жүргүзүлүп, мамлекеттик жана тиешелүү башка органдар менен биргеликте ишке ашырылууда.
Дин башкармалыгынын маалыматына ылайык, Конституциянын принциптерин, мыйзамдарды жана жарандардын дин тутуу эркиндигин сактоо диний чөйрө менен мамлекеттин светтик түзүлүшүнүн ортосундагы тең салмактуулукту камсыз кылуунун негизги шарттарынын бири болуп саналат.
