Бишкек, 23.10.26 /Кабар/. 21–23-октябрь күндөрү Германиянын Франкфурт шаарында дүйнөнүн 120дан ашык өлкөсүнөн авиакомпаниялардын, аэропорттордун жана авиация тармагынын өкүлдөрүн бириктирген ири эл аралык авиациялык форумдардын бири — Routes World 2026 өттү.
Форумдун алкагында эл аралык аба байланышын өнүктүрүүгө, жаңы маршруттарды ачууга жана глобалдык кызматташтыкты чыңдоого багытталган 10 000ден ашык ишкердик жолугушуулар жана сүйлөшүүлөр өткөрүлдү.
Бул ири эл аралык форумда Кыргызстандын атынан "Кыргызстан аэропорттору" ААК жана улуттук Asman Airlines авиакомпаниясы катышты.
Кыргызстандын форумга катышуусу быйыл өзгөчө мааниге ээ болду. Өлкө Европа биримдигинин авиациялык "кара тизмесинен" чыгарылгандан кийин эл аралык маршруттук тармакты өнүктүрүү үчүн жаңы мүмкүнчүлүктөр ачылды.
Форумдун алкагында "Кыргызстан аэропорттору" ААКнын жана Asman Airlines авиакомпаниясынын өкүлдөрү эл аралык авиациялык өнөктөштөр менен ишкердик жолугушууларды өткөрүп, кызматташуу, жаңы багыттарды ачуу жана учуулардын географиясын кеңейтүү маселелерин талкуулашты.
"Кыргызстан аэропорттору" ААК Routes World 2026 форумунун экинчи күнүнүн расмий демөөрчүсү катары катышып, анын жүрүшүндө эл аралык авиациялык коомчулукка Кыргызстандын авиация тармагынын потенциалын жана өнүгүү келечегин тааныштыра алгандыгы өзгөчө мааниге ээ болду.
