Бишкек, 16.03.26. /Кабар/. Бүгүн президентке караштуу Инвестициялар боюнча улуттук агенттиктин башчысы Равшанбек Сабиров Кытайдын Longteng Lighting Group Co., Ltd. компаниясынын өкүлдөрү менен жолукту. Бул тууралуу агенттиктен билдиришти.
Жолугушуунун жүрүшүндө компаниянын өкүлдөрү архитектуралык жана шаардык жарыктандыруу тармагында долбоорлорду ишке ашыруу боюнча эл аралык тажрыйбалары менен тааныштырышты.
Тактап айтканда, компания BRICS жана Shanghai Cooperation Organization саммиттери сыяктуу ири эл аралык иш-чаралар өткөрүлгөн аянттарды жарыктандыруу долбоорлоруна катышкандыгы айтылды.
Компания Кыргызстанда көчө жарыктарын жаңылоо жана инфраструктуралык долбоорлорду ишке ашырууга кызыкдар. Өзгөчө ШКУ саммитине даярдыктын алкагында шаарды модернизациялоого катышуу маселеси талкууланды.
Тараптар шаардык чөйрөнү өнүктүрүү, заманбап жарыктандыруу жана инфраструктураны жаңылоо үчүн инвестиция тартууну талкуулашты.
Жыйынтыгында тараптар мындан аркы кызматташтыктын мүмкүн болгон форматтары жана шаардык инфраструктураны өнүктүрүүгө, ошондой эле Кыргызстандын инвестициялык жагымдуулугун жогорулатууга багытталган келечектүү инвестициялык долбоорлорду ишке ашыруу боюнча пикир алмашты.
