Бишкек, 22.04.26. /Кабар/. Кыргыз улуттук аскер лицейинин (КУАЛ) курсанттары Өзбекстанда өткөн "Ватанпарварлар" эл аралык аскердик-спорттук мелдеште жогорку даярдыгын көрсөттү.
Коргоо министрлигинен билдиришкендей, алар командалык эсепте согуш талаасында жараат алган жоокерге биринчи медициналык жардам көрсөтүү, аны коопсуз жерге алып чыгууда жана татаал тоскоолдуктар тилкесинен өтүү көнүгүүсү боюнча 2-орунду ээлешти.
Жекелик эсепте курсант Алихан Садиров өзгөчө эрдик жана ылдамдык көрсөтүп, тоскоолдуктар тилкесин 1 мүнөт 56 секундда багындырып, мелдештин абсолюттук рекорду менен 1-орунга татыктуу болду.
Мелдешке Азербайжан, Беларусь, Россия, Казакстан, Тажикстан жана Кыргызстандын аскердик окуу жайларынын тарбиялануучулары катышууда.
Эскерте кетсек, спорттук иш-чара 19-апрелде башталган, 25-апрелге чейин уланат.
