Бишкек, 03.03.26. /Кабар/. Кыргызстандык 33 ишкер Германиянын алдыңкы компанияларында такшалма өтүп, европалык бизнес-өнөктөштөр менен баалуу тажрыйба алмашып келишти. Бул тууралуу Соода-өнөр жай палатасынан билдиришти.
Маалым болгондой, "Германия менен бизнес-өнөктөштүк" программасынын алкагында 2025-жылы ири масштабдуу тандоо өнөктүгү жүргүзүлгөн. Соода-өнөр жай палатасы жана Германиянын эл аралык кызматташтык коому (GIZ) тарабынан уюштурулган сынакка 69 талапкер катышып, анын ичинен 47 ишкер программага сунушталган.
Жыйынтыгында 33 ишкер Германияда үч жумалык такшалмада болуп, немис бизнесинин иштөө принциптерин жеринде өздөштүрүштү. Окуу сапарынын алкагында кыргызстандык менеджерлер 44 алдыңкы немис ишканасына барып, үч ири эл аралык көргөзмөгө катышууга мүмкүнчүлүк алышты.
Мындан тышкары, 83 B2B форматындагы жолугушуу өткөрүлүп, анын натыйжасында жалпы суммасы 380 миң еврону түзгөн эки келишимге кол коюлду.
