Бишкек, 26.03.26 /Кабар/. Стамбул шаарындагы Кыргызстандын башкы консулу Чыңгыз Токтобеков Кыргызстандын Мамлекеттик камсыздандыруу уюмунун өкүлдөрү менен жолугушту.
Башкы консулдуктан билдиришкендей, жолугушуу Стамбул шаарында өтүп жаткан Түрк тилдүү өлкөлөрдүн “Silk Road Insurance Forum” эл аралык форумунун алкагында орун алды.
Жолугушууга "Мамлекеттик камсыздандыруу уюму" ААК төрагасынын орун басарлары Салават Садыракунов, Закир Айдралиев, Чүй филиалынын директору Абдуталип Султанов, Ош филиалынын директору Марат Кудайбергенов жана юридикалык башкармалыктын башчысы Дыйканбай Болотбеков катышты.
Жолугушуунун жүрүшүндө тараптар Кыргызстан менен Түркиянын камсыздандыруу тармагындагы кызматташуу мүмкүнчүлүктөрү боюнча пикир алмашты.
Белгилей кетсек, Мамлекеттик камсыздандыруу уюмунун өкүлдөрү Стамбул шаарында өтүп жаткан форумда Түркиянын алдыңкы камсыздандыруу компаниялары менен өз ара кызматташуу маселелерин талкуулады.
