Бишкек, 08.09.26. /Кабар/. Күн мурун тышкы иштер министри Жээнбек Кулубаев Борбор Азия-Франция достук тобунун төрагасы Катрин Эрвьё жетектеген Французнын Улуттук жыйынынын делегациясы менен жолугушту.
Ведомстводон маалымдашкандай, жолугушууда тараптар кыргыз-француз мамилелеринин учурдагы абалын жана келечегин талкуулап, саясий диалогду жана парламенттер аралык байланыштарды чыңдоого, соода-экономикалык жана инвестициялык кызматташтыкты кеңейтүүгө, ошондой эле маданий-гуманитардык чөйрөдөгү өз ара аракеттенүүгө өзгөчө көңүл бурушту.
Француз делегациясы кыргыз тарапты Кыргызстандын БУУнун Коопсуздук кеңешинин туруктуу эмес мүчөлүгүнө шайланышы, ошондой эле ШКУ Саммитинин жана Дүйнөлүк көчмөндөр оюндарынын ийгиликтүү өткөрүлүшү менен куттуктады.
Мындан тышкары, тышкы саясий ведомствонун башчысы француз парламентарийлерине Кыргызстандын БУУнун Коопсуздук кеңешиндеги ишинин артыкчылыктуу багыттары жөнүндө маалымат берип, Дүйнөлүк көчмөндөр оюндарына француз командасынын катышкандыгы үчүн ыраазычылык билдирип, аларды жеңип алган медалдары менен куттуктады.
Өз кезегинде Эрвьё эки тараптуу кызматташтыктын динамикасына оң баа берип, парламенттер аралык өз ара аракеттенүүнү мындан ары да чыңдоого кызыкдар экенин билдирди.
Соода-экономикалык жана инвестициялык өнөктөштүктү талкуулоонун алкагында тараптар эл аралык күн тартибиндеги актуалдуу маселелерге да токтолушту. Ушуга байланыштуу министр Кулубаев кесиптештерине колдонулуп жаткан эл аралык санкциялык чараларга карата Кыргызстандын позициясын жеткирип, тышкы соода операцияларынын ачык-айкындуулугун камсыз кылуу боюнча өкмөт тарабынан көрүлүп жаткан практикалык кадамдар тууралуу маалымдады.
Жолугушуунун соңунда тараптар өз ара кызыкчылык туудурган маселелердин бардык спектри боюнча ачык пикир алмашууну улантууга өз ара даярдыгын ырасташты.
