Бишкек, 27.04.26. /Кабар/. Министрлер кабинетинин төрагасынын орун басары – суу ресурстары, экология жана техникалык көзөмөл министри Эрлист Акунбеков иш сапары менен Түштүк Кореяда жүрөт.
Ведомстводон маалымдашкандай, министр иш сапарынын алкагында KOMOTO Inc компаниясынын өндүрүштүк объектилери менен жеринде таанышты.
Министр баштаган делегация суу агымдарын жөнгө салуучу жабдууларды, анын ичинде жөнгө салуучу клапандарды жана башкаруу системаларын иштеп чыгууга жана өндүрүүгө адистешкен ишкананын ишмердүүлүгү менен таанышты. Анда энергетикада, суу чарбасында жана өнөр жайда колдонулуучу заманбап инженердик чечимдер, өндүрүш линиялары жана сыноо базасы көрсөтүлдү.
Ошондой эле гидропостторду жана сугат каналдарын аралыктан башкаруу технологиялары сунушталды.
Жолугушуунун жыйынтыгында тараптар эки тараптуу кызматташуунун келечегин талкуулап, биргелешкен долбоорлорду ишке ашыруу мүмкүнчүлүгүн, жабдууларды жеткирүүнү, ошондой эле инженердик кызматташтыкты жана адистерди даярдоону өнүктүрүү маселелерин карашты.
