Бишкек, 26.03.26. /Кабар/. ЕАЭБ өлкөлөрүнүн Бажы кызматтарынын бириккен коллегиясынын жыйынында Казакстандын Мамлекеттик кирешелер комитетинин төрагасы Жандос Дюсенбиев бажылык башкаруу чөйрөсүндө өз ара аракеттенүүнү күчөтүү жана бирдиктүү ыкмаларды иштеп чыгуу зарылдыгын белгиледи.
Анын айтымында, жолугушуунун күн тартибинде буга чейин кабыл алынган чечимдердин аткарылышы, товарларды классификациялоо, укук колдонуу тажрыйбасын өнүктүрүү, ошондой эле транзиттик жол-жоболорду жана тобокелдиктерди башкаруу тутумдарын өркүндөтүү сыяктуу кеңири маселелер каралууда.
Транзиттик ташууларды көзөмөлдөөдө маалыматтык өз ара аракеттенүү маселелерине өзгөчө көңүл бурулду.
Дюсенбиев биримдикке мүчө өлкөлөрдүн бажы кызматтары үчүн товарларды андан ары башкаруу, анын ичинде алардын акыркы декларацияланышы тууралуу толук маалымат алуу маанилүү экенин баса белгиледи.
"Мындай ыкма товарлардын кыймылынын бүтүндөй чынжырчасына комплекстүү талдоо жүргүзүүгө өтүүгө, көзөмөлдүн сапатын жогорулатууга жана мыйзам бузуу тобокелдиктерин азайтууга мүмкүндүк берет", — деди ал.
Ошондой эле ал маалымат алмашууну өнүктүрүүнү биргелешкен иштин артыкчылыктуу багыттарынын бири катары кароону сунуштады.
Мындан тышкары, сунушталып жаткан көзөмөлдөө чараларынын ак ниет бизнеске тийгизген таасирине талдоо жүргүзүү демилгесин көтөрдү. Буга байланыштуу өлкөлөрдүн жумушчу тобуна жол-жоболорду жөнөкөйлөтүү жана бизнес-процестерди жакшыртуу боюнча сунуштарды даярдоо сунушталды.
Дюсенбиев көрүлүп жаткан чаралар транзит чөйрөсүндөгү мыйзам бузуулар менен күрөшүүнүн натыйжалуулугун жогорулатууга жана тышкы экономикалык ишмердүүлүктүн катышуучулары үчүн кыйла жагымдуу шарттарды түзүүгө мүмкүндүк берерине ишеним билдирди.
