Бишкек, 12.11.26. /Кабар/. Кара-Балта шаарындагы "Жунда" мунайды кайра иштетүүчү заводун капиталдык оңдоо жана модернизациялоого багытталган инвестициянын көлөмү 193,75 млн долларга чейин көбөйдү.
Инвестициялар боюнча улуттук агенттиктен билдиришкендей, 11-ноябрда агенттиктин башчысы Равшанбек Сабиров заводдогу иштердин жүрүшү менен жеринен таанышты.
Ал ишке киргизүү алдындагы иштерди толук бүтүрүп, заводду мурда белгиленген мөөнөттө пайдаланууга берүү зарылдыгын белгиледи.
"Жылына 800 миң тонна мунай иштетүүгө ылайыкталган ишкананы жаңылоо К4 жана К5 экологиялык класстарындагы күйүүчү май өндүрүүгө өтүүгө жана ички рынокту ата мекендик мунай заттары менен камсыздоого багытталган. Долбоордун алкагында 617 кыргызстандык жумуш менен камсыздалууда", - деп айтылат маалыматта.
