Бишкек, 12.03.26. /Кабар/. Бишкекте Ички иштер министрлигинин имаратынын айланасындагы куураган дарактар санитардык кыркуудан өткөрүлдү. Бул тууралуу ведомствонун басма сөз кызматы билдирди.
Маалыматка ылайык, буга чейин аталган аймакта кургаган бутактардын сынып түшүү учурлары катталган. Ошого байланыштуу ИИМ коопсуздукту камсыздоо максатында "Бишкек жашыл чарба" муниципалдык ишканасына кайрылуу жолдогон.
Адистер тарабынан жүргүзүлгөн текшерүүнүн жыйынтыгында айрым теректердин абалы начар экени жана жөө жүргүнчүлөр менен унаалар үчүн кооптуулукту жаратары аныкталган.
Учурда "Бишкек жашыл чарбанын" кызматкерлери тарабынан дарактардын үстүңкү бөлүктөрүн санитардык кыркуу жана иретке келтирүү иштери толугу менен аяктады.
