Бишкек, 23.03.26. /Кабар/. Бишкек шаарында жашыл көчөттөрдүн бирдиктүү электрондук реестрин түзүү иштери башталды.
Муниципалитеттен билдиришкендей, “Санариптик технологиялар борбору” жана “Бишкек жашыл курулуш” ишканалары шаардагы бардык бак-дарактарды камтыган электрондук картаны иштеп чыгууда.
Долбоордун негизги өзгөчөлүктөрү:
- Жеке "паспорт": Ар бир даракка атайын бирка берилип, анда анын түрү, жашы, бийиктиги жана абалы тууралуу маалыматтар катталат.
- Санариптик көзөмөл: Тургундар электрондук карта аркылуу жашыл фонд тууралуу маалымат менен тааныша алышат.
- Максаты: Дарактардын абалын эсепке алуу, өз убагында дарылоо жана кооптуу (куроого учураган) бактарды алмаштыруу.
Мэриядан белгилешкендей, социалдык тармактарда тарап жаткан "Эркиндик бульварында дарактар массалык түрдө кыйылып жатат" деген маалымат чындыкка дал келбейт. Учурда аталган аймакта жашыл фондду сактоо максатында инвентаризациялоо иштери гана жүрүп жатат.
