Бишкек, 09.04.26. /Кабар/. Бүгүн, 9-апрелде энергетика министри Таалайбек Ибраев Бишкек электр тармактар ишканасында кызматтардын уюштурулушу менен таанышты. Бул тууралуу Энергетика министрлигинен билдиришти.
Ведомствонун маалыматына ылайык, министр ишканын кампаларын карап чыгып, авариялык кырдаалдарды ыкчам жоюу үчүн керектүү материал жана жабдуулардын жетиштүүлүгүн текшерди.
Компания жетекчиси жабдуулар жетиштүү экенин билдирип, алдыдагы күз-кыш мезгилине карата даярдык иштери башталгандыгын айтты.
Ошондой эле, Таалайбек Ибраев жаңы "Ош" базары жана жаңы автобекеттин аймагында 90 чакырым СИП-3 өткөргүчүн тартуу иштерин тездетүү керектигин белгиледи.
Жыйынтыгында энергетика министри электр менен камсыздоонун ишенимдүүлүгүн жогорулатуунун маанисине токтолуп, Шанхай кызматташтык уюмунун иш-чараларына жана Көчмөндөр оюнуна даярдык көрүүнү, электр энергиясы менен үзгүлтүксүз камсыз кылуу үчүн сапаттуу иш алып барууну тийиштүү жетекчилерге тапшырды.
Мындан тышкары, күз-кыш мезгилине даярдыкты күчөтүү, оңдоо иштерин өз убагында аткаруу, авариялык бригадалардын даярдыгын камсыз кылуу жана ресурстарды натыйжалуу пайдалануу боюнча так тапшырмалар берилди.
