Бишкек, 20.02.26. /Кабар/. Кыргызстанда мал ооруларынын очокторун жана жайылышын көзөмөлдөөчү жаңы санариптик система ишке кирүүдө. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
"ОЭМС" деп аталган маалыматтык системасын Ветеринария кызматы "АгроСмарт" мекемеси менен биргеликте иштеп чыга баштады.
Бул система эмне үчүн керек жана кандай пайдасы бар?
Мурда сибирь жарасы же башка коркунучтуу оорулар чыккан жерлер кагаз бетинде же архивдерде гана сакталса, эми баары интерактивдүү картага түшүрүлөт. Бул төмөнкү мүмкүнчүлүктөрдү берет:
- Картадан сибирь жарасынын очоктору, мал көмүлгөн жайлар жана ветеринардык пункттар кайда экенин так көрүүгө болот.
- Эгерде бир жерде жаңы оору катталса, система тийиштүү адистерге автоматтык түрдө кабар берип, коңгуроо кагат.
- Мал жандыктарына жасалган эмдөөлөр жана башка ветеринардык иш-чаралар санариптик базага катталып, эч нерсе көз жаздымда калбайт.
- Маалыматтардын ачык жана так болушу өлкөдөгү биологиялык коопсуздукту бекемдеп, илдеттердин алдын алууну жеңилдетет.
Жалпысынан бул система ветеринарларга ишти заманбап деңгээлде алып барууга, ал эми элге коопсуз чөйрөдө жашоого шарт түзөт.
