Бишкек, 25.02.26. /Кабар/. Эми бийик тоолордогу электр тармактарын дрондор көзөмөлдөй баштайт. Бул тууралуу "Кыргызстан улуттук электр тармагы" ААКтан билдиришти.
Компания "Бизнес Стандарт" ЖЧКсы менен жогорку чыңалуудагы аба чубалгыларын дрондордун жардамы менен көзөмөлдөө боюнча пилоттук долбоорду ишке ашыруу максатында меморандум түздү.
Долбоор ата мекендик өндүрүштү колдоого жана бийик тоолуу, барууга кыйын болгон аймактардагы энергетиктердин ишин жеңилдетүүгө багытталган.
Дрондордун техникалык мүнөздөмөсү:
- тик учууга жана конууга ылайыкташтырылган;
- 150 чакырымга чейинки аралыктагы аба чубалгыларын текшере алат;
- учуу убактысы 8 саатка чейин жетет.
Бул заманбап технологиялык чечим электр тармактарынын абалын ыкчам көзөмөлдөөгө жана авариялык абалдардын алдын алууга шарт түзөт.
