Бишкек, 25.11.25. /Кабар/. 20–21-ноябрда өткөн "КМШ үчүн 100 идея" эл аралык конкурсуна Көз карандысыз мамлекеттер шериктештигине (КМШ) мүчө сегиз мамлекеттен 50 инновациялык долбоор катышты.
Маданият министрлигинен билдиришкендей, сынакка өлкөлөрдүн эң мыкты, чыгармачыл жана демилгелүү жаштары эко-инновация, социалдык өнүгүү, технология, ишкердик жана башка тармактар боюнча өз демилгелерин сунушташты.
Кыргызстандын атынан жалпы 5 долбоор катышып, алардын арасынан Нураида Зайнишова жана Оксана Өмүркулова тарабынан сунушталган долбоор "Жаратылыш ресурстарын сарамжалдуу пайдалануу" номинациясында жеңишке жетишти.
Жеңүүчүлөрдүн ERID аттуу долбоору текстиль калдыктарын суюк төшөлмөгө кайра иштетүүнү максат кылат. Бул ыкма калдыктарды кайра пайдаланууну кеңейтүүгө жана экологиялык жүктү азайтууга багытталган инновациялык чечим катары жогору бааланды.
Кыргызстандык жаштардын бул ийгилиги өлкө жаштарынын экологиялык, социалдык жана инновациялык демилгелерге активдүү катышып жатканын дагы бир жолу тастыктайт.
