Бишкек, 16.04.26 /Кабар/. Быйыл Талас облусунда үч энергетикалык объектинин курулушу аяктап, пайдаланууга берилет. Бул тууралуу Энергетика министрлиги билдирет.
Маалыматта белгиленгендей, учурда темир-бетон буюмдарын чыгаруучу жаңы цехтин котлован казуу иштери аяктады. Андан электр мамычалары, ошондой эле суу өткөргүч темир-бетон шакектер, темир-бетон мамыча сыяктуу буюмдар чыгарылат. Жылына 2 миңден ашуун мамыча өндүрүлүп, жергиликтүү өндүрүштү өнүктүрүүгө, чыгымдарды кыскартууга жана жаңы 8 жумуш ордун түзүүгө мүмкүндүк берет.
Мындан тышкары, Абдыкалык Калматов участогундагы административдик имарат курулууда. Учурда пайдубалы куюлуп жатат. Имарат бир кабаттуу болуп, жалпы аянты 238 чарчы метрди түзөт жана 8 кызматкерге ылайыкталат. Бул объект 1960-жылы курулган эски имараттын ордуна салынууда.
Андан сырткары, Талас электр тармактар ишканасынын аймагында жайгашкан жогорку чыңалуудагы аба линиялары жана Электр жабдууларын сыноо, өтө чыңалуудан коргоо жергиликтүү кызматы, ашыкча чыңалуудан коргоо кызматы, сыноо кызматтарынын имараты реконструкциядан өткөрүлөт.
Жогоруда аталган иштер Улуттук электр тармактарынын өздүк каражаттарынын эсебинен каржыланып, иштерди Талас электр тармактар ишканасы жүргүзүүдө.
