Бишкек, 09.02.26. /Кабар/. Бишкек шаарында ири жер тилкеси жана өндүрүш базасы мамлекеттин балансына кайтарылды.
УКМКдан билдиришкендей, сөз Т. Фрунзе көчөсү, 1А дарегинде жайгашкан 0,64 гектар аянттагы өндүрүштүк база тууралуу болуп жатат.
Текшерүү маалында бул объект мамлекеттик мүлк болгонуна карабай, жеке менчикке мыйзамсыз өткөрүлүп кеткендиги аныкталган. Тарыхына кайрылсак, 1988-жылы “Кыргызкурулуш” акционердик коомунун турак жай кеңсесинин базасында “Айбол” ЖЧКсы түзүлүп, менчиктештирүү процессинде ага жер тилкеси бар өндүрүш базасы берилген.
Бирок маанилүү шарт бар эле: компания турак үйлөрдү тейлөө багытын сактоого милдеттенген. Башкача айтканда, ишмердүүлүктү өзгөртүүгө же мүлктү сатууга негиздөөчүлөрдүн жалпы макулдугусуз тыюу салынган. Ошого карабастан, 2010-жылдан кийин коммуналдык иштер кыскарып, база коммерциялык максатта колдонула баштаганы аныкталган.
Мындан сырткары, ишкананы көзөмөлдөө ошол учурда өкмөт аппаратынын жетекчисинин орун басары болуп иштеген КР жараны Д.Б.га өткөнү белгилүү болгон. Ал бул башкарууну өзүнүн апасы Р.З. аркылуу жүргүзгөн — ал “Айбол” ЖЧКсынын директору болуп дайындалган.
Тергөө иштеринин жүрүшүндө Д.Б. мыйзам бузуу фактыларын түшүнүп, келтирилген зыяндын ордун толтуруу максатында өндүрүш базасын, цехтерди, кампаларды жана 0,64 гектар жер тилкесин өз ыктыяры менен мамлекетке өткөрүп берген.
Эми бул жер тилкелери көз карандысыз эксперттер тарабынан бааланып, андан соң Бишкек шаардык мэриясынын балансына өткөрүлүп берилери маалымдалды.
