Бишкек, 25.04.26. /Кабар/. Бишкекте "Бишкексууканал" муниципалдык ишканасынын чыгымдарынын өсүшүнө байланыштуу суу менен камсыздоо жана саркынды сууларды чыгаруу боюнча тарифтерди жогорулатуу пландалууда. Ишкананын директорунун орун басары Алибек Канымет уулу "Биринчи радионун" түз эфиринде билдиргендей, негизги себеп - электр энергиясына кеткен чыгымдардын дээрлик эки эсеге көбөйүшү.
Анын айтымында, 2022-жылы бекитилген 10,45 сомдук учурдагы тариф реалдуу чыгымдарды жаппай калды. Мындан тышкары, шаар калкынын өсүшү, шаар аймагынын кеңейиши жана инженердик тармактардын эскириши системага чоң оорчулук келтирүүдө.
Эске салсак, коомдук талкууга коюлган долбоорго ылайык:
- ичүүчү суунун тарифи бир куб метр үчүн 15,73 сомго чейин;
- канализация кызматы 6,80 сомго чейин көтөрүлүшү мүмкүн.
Коммерциялык керектөөчүлөр үчүн жогорулатуу коэффициенттери каралган:
- бизнес үчүн - 2,1;
- сууну көп талап кылган ишканалар үчүн (мончо, сауна, автоунаа жуучу жайлар жана мал союучу жайлар) - 3.
Ошондой эле, үйдүн ичиндеги тармактарды тейлөө акысын жылына бир чарчы метр үчүн 26,40 сомго (калк үчүн айына болжол менен 2,20 сом) чейин көтөрүү сунушталууда.
Алибек Канымет уулу белгилегендей, ишкананын алдындагы негизги көйгөйлөр - тармактардын эскилиги, тутумга түшкөн жүк, материалдардын жана жабдуулардын баасынын өсүшү, ошондой эле тейлөө аймагынын кеңейиши жана кадрлардын жетишсиздиги.
Айрыкча электр энергиясына кеткен чыгымдардын өсүшү баса белгиленди: эгерде 2023-жылы бул көрсөткүч 178 млн сомду түзсө, 2026-жылы 434 млн сом болот деп болжолдонууда. Бул борбор калаадагы суу жер алдындагы булактардан алынып, электр энергиясы менен иштеген насостор аркылуу берилгендигине байланыштуу.
Муну менен катар, шаарда жаңы магистралдык канализациялык коллекторду куруу долбоору ишке ашырылууда. Эл аралык донорлордун колдоосу менен 2021-жылдан бери жүрүп жаткан бул иштер борбор калаанын тез өнүгүп жаткан түштүк бөлүгүн тейлөөгө багытталган. Коллектордун узундугу 11 чакырымга жакын, кубаттуулугу суткасына 100 миң куб метрден ашат. Бул учурдагы системанын жүгүн азайтып, кошумча көлөмдөгү саркынды сууларды кабыл алууга мүмкүнчүлүк берет.
"Бишкексууканал" учурдагы тарифтер болгону күнүмдүк чыгымдарды гана жаап, инфраструктураны модернизациялоого жана кредиттик милдеттенмелерди аткарууга каражат жетпей жатканын белгилейт. Тарифтерди кайра карап чыгуунун негизги себеби катары электр энергиясынын кымбатташы аталууда.
