Бишкек, 12.02.26. /Кабар/. Быйыл президент Садыр Жапаровдун тапшырмасы менен өлкөнүн ири шаарларында 36 мектептин курулушу башталды. Бул тууралуу президенттин администрациясынын маалыматтык саясат кызматынын жетекчиси Дайырбек Орунбеков социалдык тармактагы баракчасына жазды.
Анын айтымында, мамлекет жыл сайын жүздөн ашык мектептердин курулушун активдүү жүргүзүп келет.
"Бул билим берүү тармагын өнүктүрүүгө болгон аракет. Бул жылы дагы адаттагыдай эле өлкө аймагында мектептердин курулушу уланат. Ал эми калкы жыш жайгашкан ири шаарларда мектеп тартыштыгын жоюу максатында, президентибиз Садыр Жапаров тарабынан даректүү тапшырмалар коюлган. Ага ылайык:
- Бишкек шаарында — 20 мектеп;
- Ош шаарында — 10 мектеп;
- Манас шаарында — 6 мектептин курулушу башталды.
Курулуп жаткан мектептер 270 орундан баштап 500, 600, 750 жана 1200 орундуу болуп бүткөрүлөт. Себеби, ушул 3 шаарда мектеп тартыштыгы курч бойдон.
Бул жерде 3 ири шаарда жаңы башталган мектептер гана айтылды. Мындан тышкары, өлкө боюнча планда каралган мектеп курулуштары дагы көп. Алар боюнча өзүнчө толук тизме жарыялайм", - деди ал.
