Бишкек, 06.04.26. /Кабар/. Транспорт жана коммуникациялар министрлигине караштуу "Барскоон – Бедел автомобиль жолун куруу боюнча мамлекеттик дирекция" мамлекеттик мекемеси түзүлдү.
Ведомстводон билдиришкендей, жаңы түзүлгөн дирекция Барскоон – Бедел жолун куруу долбоорун ишке ашырууну уюштуруучу жана координациялоочу ыйгарым укуктуу мамлекеттик орган болуп саналат.
Министрлер кабинетинин төрагасы Адылбек Касымалиевдин тескемесине ылайык, мамлекеттик мекеменин башкы директорлугуна Акылбек Мусабаев дайындалды.
Дирекция Барскоон – Бедел унаа жолун куруу долбоорун жалпы башкарып, ишке ашырууну координациялайт, каржылык каражаттардын натыйжалуу жана максаттуу пайдаланылышын камсыз кылат. Ошондой эле социалдык, экологиялык жана техникалык талаптардын сакталышын көзөмөлдөйт.
Маалымат үчүн: Барскоон – Бедел унаа жолунун жалпы узундугу болжол менен 150 чакырымды түзөт. Ал Ысык-Көл облусунун Барскоон айылын Кытай менен чектешкен "Бедел" көзөмөл-өткөрмө пункту менен байланыштырган стратегиялык маанилүү коридор болуп калат. Долбоордун алкагында 2 туннель, 30дан ашык көпүрө жана коргоочу инженердик курулмалардын курулушу каралган.
Белгилей кетсек, курулуш иштери 2025-жылдын 26-августунда башталган. Долбоорду ишке ашыруу мөөнөтү 5 жылды түзөт. Планга ылайык, негизги курулуш иштери 2029-жылы аяктап, 2030-жылы жол толук пайдаланууга берүү мерчемделген.
