Бишкек, 18.02.26 /Кабар/. Бүгүн “Ала-Арча" мамлекеттик жаратылыш паркындагы асма жол өлкө башчысы Садыр Жапаровдун катышуусунда расмий түрдө пайдаланууга берилди.
Асма жолдун узундугу - 1 чакырымды түзөт. Анда 10 киши батчу 16 фуникулёр кабина орнотулган. Анын экөө VIP- кабина, ал 4 кишиге ылайыкташкан. Жогорку станциясы - 2494 м бийиктикте, төмөнкү станциясы - 2166 м бийиктикте жайгашкан. Кызмат кылуу мөөнөтү 50 жыл деп мерчемделген. Саатына миң адамды тоо башына жеткире алат.
Асма жолдун жогорку станциясына 20 A-frame үй жана 3 кабаттуу эко-мейманкана курулууда.
Эскерте кетсек, курулуш иштери 2025-жылдын январь айында башталган. Иштерди асма жолдорду долбоорлоо, куруу жана тейлөө боюнча дүйнөлүк лидерлердин бири - австриялык Doppelmayr компаниясы аткарды.
Маршруттун жалпы узундугу 23 чакырымды түзөт. Учурда курулуштун биринчи этабы аяктады.
Бул долбоорлор санариптештирүү жана экологияга аяр мамиле жасоо деген принциптер менен ишке ашырылып келүүдө.
