Бишкек, 25.02.26. /Кабар/. "Чакан ГЭС" ААК Кытайдын China National Heavy Machinery Corporation компаниясы менен Лебединовка ГЭСин реконструкциялоо боюнча келишим түздү. Бул тууралуу Энергетика министрлиги билдирди.
Маалыматка ылайык, учурда подрядчы компания долбоорлоо-сметалык документтерди даярдоого киришти. Модернизациялоонун алкагында төмөнкүдөй көрсөткүчтөргө жетишүү пландалууда:
- ГЭСтин кубаттуулугу 7,6 МВттан 10 МВтка чейин жогорулайт;
- Электр энергиясын жылдык өндүрүү 37,2 млн кВт·сааттан 53,5 млн кВт·саатка жетет;
- Станциянын жабдуулары толук жаңыланып, иштөө мөөнөтү узартылат.
Маалымат үчүн: Лебединовка ГЭСи — Чүй облусундагы эң эски станциялардын бири. Анын курулушу 1942-жылы согуш маалында башталып, 7 миңден ашуун аялдардын жана балдардын катышуусу менен рекорддук кыска мөөнөттө (1 жыл 2 жумада) бүткөрүлгөн. 1943-жылдан тарта станция Фрунзе шаарын жана фронт үчүн иштеген заводдорду электр энергиясы менен камсыздап келген.
