Бишкек, 29.06.26. /Кабар/. "Ачык кабинет: жоопкерчилик аймагы" медиадолбоорунун алкагында жаратылыш ресурстары, экология жана техникалык көзөмөл министри Акыл Токтобаев №118 орто мектебине барды.
Сапардын жүрүшүндө ал жылытуу тутумунун иши менен таанышып, альтернативдүү энергия булактарына өтүүнүн жыйынтыктарын текшерди.
"Түтүнгө каршы күрөшүү боюнча жалпы саясаттын алкагында жылытуунун альтернативдүү булактарына өтүп жатабыз. Бул ага каршы күрөшүүнүн бир ыкмасы. Биз азыр мурда көмүр менен иштеген казандар колдонулуп келген мектептин аймагына келдик, учурда бул жерге жылуулук насостору орнотулду", - деп белгиледи министр.
Ал кошумчалагандай, башка долбоордун алкагында Бишкек шаарында жана Чүй облусунда жылуулук насосторун орнотууга 10 млн сом бөлүнүүдө.
"Бул долбоордун алкагында 30 мектепти жылуулук насосторуна өткөрүүнү пландап жатабыз", – деди Токтобаев.
Ал №118 мектептеги тутумдун ишинин жыйынтыгына баа берип жатып, анын натыйжалуулугуна токтолду.
"Албетте, жыйынтык бар. Муну өзгөчө №118 мектептен байкоого болот. Жылытуунун альтернативдүү тутумуна өтүүнүн аркасында көмүр жагуудан баш тарттык жана зыяндуу калдыктардын бөлүнүп чыгышы дээрлик жокко эсе. Негизги натыйжа дал ушунда", – деп жыйынтыктады ал.
