Бишкек, 04.09.25. /Кабар/. Жол кыймылынын коопсуздугун камсыздоо башкы башкармалыгынын жетекчиси Жеңишбек Жоробеков коомдук транспортторду күтүүсүз текшерди.
Ведомстводон билдиришкендей, “Коомдук транспорт” аталышындагы рейддин алкагында шаардагы жүргүнчү ташыган мекеме-ишканалар таң эрте текшерилип, автопарктардын ишмердүүлүгү көзөмөлдөндү. Натыйжада коомдук транспорттордун техникалык абалы жана айдоочулардын медициналык кароодон өтүүсү текшерилип, эрежелер бузулган фактылар боюнча жалпы 189 500 сом айып салынды.
Ошондой эле башкы башкармалыктын жетекчиси жалпы айдоочуларына жолдо жүрүүдө айдоо маданиятын сактоо, унаа башкаруу учурунда уюлдук телефонго алагды болбоо, жүргүнчүлөрдү салууда же түшүрүүдө аялдамаларда гана токтоо, эң негизгиси жол кыймылынын башка катышуучуларына тоскоолдуктарды жаратпай жол эрежелерине баш ийүү зарылчылыгын белгиледи.
Эске салсак, буга чейин өлкө башчыбыз коомдук транспорттордун айдоочуларын жол эрежелерин сактоого чакырып, бул багытта тийиштүү иш-чараларды күчөтүү тапшырмасын койгон.
