Бишкек, 20.01.26. /Кабар/. Бүгүн Жогорку Кеңештин төрагасы Нурланбек Тургунбек уулуна Жусуп Баласагын атындагы Кыргыз улуттук университетинин “Ардактуу профессору” наамы ыйгарылды. Бул тууралуу парламенттен билдиришти.
Салтанаттуу иш-чарада университеттин ректору Догдурбек Чонтоев 100 жылдык тарыхы бар өлкөнүн башкы окуу жайын өнүктүрүүдө төраганын салымы чоң экенин белгиледи.
Анын айтымында, Нурланбек Тургунбек уулу билим берүү тармагындагы демилгелерди жигердүү колдоп келет, бул болсо окутуунун сапатын көтөрүүдө өзгөчө мааниге ээ.
«Университеттин окумуштуулар кеңешинин чечими менен Нурланбек Тургунбек уулуна «Жусуп Баласагын атындагы КУУнун Ардактуу профессору» наамын ыйгаруу чечими кабыл алынды», – деди ректор.
Наам ыйгаруу менен бирге, төрагага окуу жайдын 100 жылдык маарекелик медалы да тапшырылды.
