Бишкек, 10.04.26 /Кабар/. Бүгүн австриялык тараптын демилгеси менен Кыргызстандын тышкы иштер министри Жээнбек Кулубаев Австриянын европалык жана эл аралык иштер боюнча федералдык министри Беате Майнль-Райзингер менен телефондо сүйлөштү.
Тараптар эки өлкө ортосундагы мамиленин учурдагы абалын жана келечегин талкуулап, Кыргызстандын президенти Садыр Жапаровдун 2024-жылы Австрияга жасаган сапарынын жыйынтыгы боюнча өз ара аракеттенүүнүн оң динамикасын белгилешти.
Саясий диалогду улантуунун, соода-экономикалык жана инвестициялык байланыштарды тереңдетүүнүн маанилүүлүгү баса белгиленди.
Эл аралык уюмдардын алкагында эки мамлекеттин кызматташуусуна өзгөчө көңүл бурулуп, анын ичинде туруктуу тоо өнүгүүсү маселелерин илгерилетүү жана 2027-жылы Бишкек шаарында экинчи Глобалдык тоо саммитин өткөрүү маселелери каралды.
Сүйлөшүүнүн жыйынтыгында кыргыз-австриялык мамилелерди мындан ары чыңдоого өз ара кызыкдарлык ырасталып, жакын арада жолугушуу өткөрүү боюнча макулдашууга жетишилди.
