Бишкек, 23.10.25. /Кабар/. Бишкек шаарынын мэри Айбек Жунушалиев жаратылыш ресурстары, экология жана техникалык көзөмөл министри Медер Машиев менен бирге Свердлов районундагы №12 мектептин аймагына көчөт отургузду.
Муниципалитеттен билдиришкендей, Жунушалиев мэрия шаардын жашыл фондун көбөйтүү үчүн бардык аракеттерди көрүп жатканын баса белгиледи.
"Бизди бак-дарактарды кыюу үчүн көп сындашат, бирок алар кургап, жараксыз болуп калган өсүмдүктөр болчу. Алардын ордуна биз он жана андан көп жаш көчөттөрдү отургузуп жатабыз. Биздин милдет — "жашыл шаар" деген статусту сактап калуу", — деп белгиледи ал.
Мындан тышкары, Чүй проспектиси менен Курманжан Датка көчөсүнүн кесилишине да жашыл бак-дарактар отургузулду.
Көчөт отургузуу иштери "Жашыл мурас" долбоорунун жана Экокеңеш-2025 чечимдеринин алкагында уюштурулуп, мектеп аймактарына өзгөчө көңүл бурулган.
Жалпысынан борбор калаага 10 миң көчөт отургузуу пландалууда, бул иштер шаардын башка райондорунда да уланууда.
