Бишкек, 01.06.26. /Кабар/. Энергетика министринин орун басары Салават Садыракунов өлкөдөгү кайра жаралуучу энергия жана гидроэнергетика багытындагы ири долбоорлордун курулуш аянтчаларын кыдырды.
Ведомстводон маалымдашкандай, иш сапардын негизги максаты - объектилердин сапаттуу курулушун жана бекитилген графиктердин сакталышын жеринде көзөмөлдөө болду.
Жакынкы айларда өлкөнүн энергетикалык тутумуна кошула турган стратегиялык объектилердин ишке кирүү мөөнөттөрү төмөндөгүдөй:
- "РЭЦА" күн электр станциясы (1-фаза): Кубаттуулугу 150 МВт болгон бул ири станциянын биринчи этабы үстүбүздөгү жылдын июнь айынын ортосунда аяктоо алдында турат.
- Орто-Токой ГЭСи: Кубаттуулугу 21 МВтты түзгөн станциянын курулушу жыйынтыктоочу баскычка жетти. Объектти пайдаланууга берүү боюнча даярдык иштери июль айына чейин толук бүтөт.
- "Бишкек Солар" күн электр станциясы (1-этап): Кубаттуулугу 100 МВт болгон бул долбоордун биринчи кадамы ушул жылдын август айында пайдаланууга берилет.
Министрдин орун басары курулуш иштеринин сапатына туруктуу көзөмөл жүргүзүүнү жана графиктен кечигүүлөргө жол бербөөнү катуу тапшырды.
