Бишкек, 16.04.26 /Кабар/. Жарандардын президентке кайрылуулары көз жаздымда калбайт. Бул тууралуу бүгүн, 16-апрелде, президенттин Ош облусундагы ыйгарым укуктуу өкүлү Аманкан Кенжебаев иш сапардын жыйынтыгы боюнча атайын жыйында айтты.
Президенттин аймактагы өкүлчүлүгүнөн билдиришкендей, жыйынга акимдер жана укук коргоо органдарынын жетекчилери катышты. Облус башчысы түшкөн ар бир кайрылуу тиешелүү тармактар боюнча бөлүштүрүлүп, өз убагында аткарылышы керектигин эскертти.
Жыйында Аманкан Кенжебаев президенттин эл менен болгон жолугушууларында жалпы 1800дөн ашуун суроо-талап түшкөнүн белгилеп, ар бир райондо көтөрүлгөн маселелерге өзүнчө токтолду.
"Жарандар тарабынан көтөрүлгөн маселелердин аткарылышын жеке көзөмөлүмө алам. Ар бир суроо-талап көз жаздымда калбашы керек", — деп баса белгиледи Аманкан Кенжебаев.
Ошондой эле облус башчысы жарандар тарабынан көтөрүлгөн маселелердин аткарылышын жеке көзөмөлүнө аларын билдирип, тиешелүү жетекчилерге бир катар тапшырмаларды берди. Мындан сырткары жыйында облус аймагында учурда аткарылып жаткан иштердин жүрүшү жана алдыдагы пландар талкууланып, жооптуу тараптарга так милдеттер жүктөлдү.
