Бишкек, 06.03.26. /Кабар/. Жалал-Абаддагы жаңы эл аралык аэропорттун курулушу токтогон жок. Бул тууралуу президенттин аймактагы өкүлчүлүгүнөн билдиришти.
"Учурда социалдык тармактарда Жалал-Абадда курулуп жаткан жаңы эл аралык аэропорттун курулушу токтоп калды деген маалыматтар чындыкка дал келбейт", - деп айтылат маалыматта.
Маалыматта белгиленгендей, Сузак районунун аймагында 381 гектар аянтка курулуп жаткан жаңы эл аралык аэропорттун курулуш иштери уланууда. Долбоордун буйрутмачысы "Кыргызстан аэропорттору" ААК. Башкы подрядчы – президенттин Иш башкармалыгына караштуу "Кыргызстройсервис" мамлекеттик ишканасы болуп саналат.
Учурда курулуш жүрүп жаткан тилкеде жогорку чыңалуудагы электр чубалгылары жайгашкандыктан жана аба ырайынын шарттарына байланыштуу айрым техникалык иштер жүргүзүлүп жатат. Ушуга байланыштуу убактылуу техникалык токтоо болгон. Ошол эле учурда курулуш иштерин жүргүзүп жаткан компания өз ишин улантууда.
