Бишкек, 16.06.26. /Кабар/. Жалал-Абад облусунун Тогуз-Торо районундагы “Саймалуу-Таш” мамлекеттик жаратылыш паркында жана Чүй облусундагы Суусамыр жайлоосунун аймагына орнотулган фотокапкандарга элик, каман, сүлөөсүн, суусар сыяктуу жапайы жаныбарлар түштү. Бул тууралуу NABU Кыргызстан уюмунан билдиришти.
Маалыматка ылайык, фотокапкандар уюмдун түштүк бөлүмүнүн Барс-2 тобунун кызматкерлери тарабынан былтыр орнотулган.
“Учурда фотомаалыматтар боюнча аймактагы жапайы жаныбарлардын таралышы, жүрүү багыттары жана саны такталууда”, - деп айтылат маалыматта.
Белгилей кетсек, буга чейин уюм Чүй облусундагы "Чоң-Кемин" мамлекеттик жаратылыш паркы, Ош облусундагы Кара-Суу районунун Сарыгой капчыгайы жана Жалал-Абад облусундагы Чычкан капчыгайынын аймагындагы фотокапкандардагы жапайы жаныбарлардын сүрөттөрү менен бөлүшкөн.
