Бишкек, 11.03.25. /Кабар/. “Дин тутуу эркиндиги жана диний бирикмелер жөнүндө” жаңы кабыл алынган мыйзамдын аткарылышы тууралуу маалыматтык-түшүндүрүү иш-чарасы уюштурулду. Бул тууралуу Дин иштери боюнча мамлекеттик комиссиядан билдиришти.
Маалыматта белгиленгендей, иш-чарага Ысык-Көл облустук ички иштер башкармалыгынын экстремизмге, мыйзамсыз миграцияга каршы аракеттенүү кызматынын башчысы жана облустун казысы катышты.
Анда Дин иштери боюнча мамлекеттик комиссиянын Ысык-Көл облусундагы өкүлү тарабынан облустук казыяттын, шаардык хатибияттын кызматкерлерине жана Каракол шаар аймагынын имамдарына маалыматтар берилди.
Эми мындай иш-чараны облустун райондордогу жергиликтүү мамлекеттик жана муниципалдык органдардын, укук коргоо органдарынын кызматкерлерине, билим берүү тармагынын өкүлдөрүнө жана имамдарга өткөрүү пландалып жатат.
