Бишкек, 16.11.26. /Кабар/. Ысык-Көл облусунда 110 жаранга акысыз юридикалык консультация берилди. Бул иш-чаралар президент Садыр Жапаровдун жергиликтүү тургундар менен жолугушууларынын алкагында уюштурулду.
Юстиция министрлигинин маалыматына ылайык, көчмө кабылдамалар Каракол жана Чолпон-Ата шаарларында, ошондой эле Жети-Өгүз, Түп, Ак-Суу, Тоң жана Ысык-Көл райондорунда иштеди.
Кайрылуулардын басымдуу бөлүгү жер талаштары, мурасты тариздөө, алимент өндүрүү, адвокаттардын кызматтары жана соттук-эксперттик кызматтын ишине байланыштуу болду.
Мындан тышкары, жарандардын жазуу жүзүндөгү арыздары кабыл алынып, кароо жана мыйзам чегинде чечүү үчүн тиешелүү бөлүмдөргө жөнөтүлдү.