Бишкек, 20.06.26. /Кабар/. Бүгүн, 20-июнда Чолпон-Ата шаарында Чыңгыз Айтматов атындагы Ысык-Көл эл аралык форуму жыйынтыкталып, резолюция кабыл алынды. Бул тууралуу Маданият. маалымат жана жаштар саясаты министрлигинен билдиришти.
Маалыматка ылайык, форумдун ишине дүйнөнүн ар кыл өлкөлөрүнөн келген көрүнүктүү окумуштуулар, жазуучулар, коомдук жана саясий ишмерлер, эл аралык уюмдардын өкүлдөрү катышып, бүгүнкү күндүн глобалдык чакырыктары, гуманизм, тынчтык, экологиялык коопсуздук жана маданияттар аралык диалог маселелерин талкуулашты.
Кабыл алынган резолюцияда азыркы дүйнөдө күчөп жаткан геосаясий чыңалуулар, куралдуу кагылышуулар, климаттык өзгөрүүлөр, социалдык-экономикалык теңсиздик жана технологиялык трансформациялар адамзаттын алдында жаңы милдеттерди жаратып жаткандыгы белгиленди.
Документте Чыңгыз Айтматовдун гуманисттик идеяларын жана Ысык-Көл форумунун интеллектуалдык мурасын өнүктүрүүгө багытталган бир катар демилгелер камтылган. Алардын катарында эл аралык диалогду бекемдөө, тынчтыкты жана өз ара түшүнүшүүнү чыңдоо, айлана-чөйрөнү коргоо, тоо экосистемаларын жана мөңгүлөрдү сактоо, жаш окумуштууларды колдоо, ошондой эле форумдун ишмердүүлүгүн туруктуу негизде улантуу боюнча сунуштар бар.
Резолюцияга ылайык, Ысык-Көл форумун төрт жылда бир жолу Кыргызстанда өткөрүү, анын ишин координациялоо үчүн Бишкек шаарында Туруктуу координациялык кеңеш (катчылык) түзүү жана форумдун эл аралык аброюн жогорулатууга багытталган демилгелерди илгерилетүү сунушталды.
Форумдун катышуучулары резолюцияда камтылган сунуштарды жана демилгелерди эл аралык уюмдарга жолдоп, алардын кеңири колдоосуна жетишүү зарылдыгын белгилешти.
Белгилей кетсек, Чыңгыз Айтматовдун демилгеси менен негизделген Ысык-Көл форуму 1986-жылы дүйнөнүн белгилүү ойчулдарын жана коомдук ишмерлерин бириктирген эл аралык интеллектуалдык аянтча катары түзүлгөн. Быйыл форум өзүнүн 40 жылдык мааракесин белгилеп жатат.
