Бишкек, 19.11.25. /Кабар/. “Мамлекеттик камсыздандыруу уюму” ААКнын Чүй филиалынын адистери аймактарда үйдү милдеттүү жана ыктыярдуу камсыздандыруунун тарифтери, шарттары жана тартиби тууралуу “Биринчи радионун” түз эфиринде айтып беришти.
Аталган филиалдын камсыздандыруу боюнча башкы адиси Элина Умуралиева белгилегендей, милдеттүү камсыздандырууну алуу үчүн турак жайдын техникалык паспорт менен менчик ээсинин паспорту талап кылынат.
Ал эми тарифтер төмөндөгүдөй:
- айыл жериндеги турак жай үчүн - 612 сом;
- шаарлардагы турак жай үчүн - 1 224 сом.
Ал эми ыктыярдуу камсыздандыруу турак жайды гана эмес, коммерциялык объекттерди да камтышы мүмкүн.
Филиалдын чекене сатуулар секторунун башчысы Кенжебек Кадырбаев жарандардын кайсы жерде жашаганына карабастан камсыздандырууну алса боло тургандыгын баса белгиледи.
“Чүй облусунун сегиз районунда филиалдарыбыз бар, алар шаар жана айылдарга бөлүнөт. Кардарлар колл-борборлорго кайрыла алышат. Ошондой эле быйылкы жылдан баштап 2ГИС тиркемесинде сатуу пункттары ачылды. Биринчиден, кардар эмнени камсыздандыргысы келерин аныктап алышы керек. Каалаган сатуу бөлүмүнө кайрыла алышат”,-деди ал.
Милдеттүү камсыздандыруу эмнелерден коргойт?
Умуралиева белгилегендей, милдеттүү камсыздандыруу төмөнкү учурларда келип чыккан чыгымдарды төлөп берет:
- өрт;
- бардык табигый кырсыктар;
- өрттү өчүрүүдөн кийинки суунун кирүүсү.
“Камсыздоо коргоосуна кирген жана кирбеген табигый кырсыктардын тизмеси бар. Мисалы, жер титирөөдөн келип чыккан зыяндардын төлөмү алты баллдан жогору болгон учурда гана төлөнөт”,-деп кошумчалады ал.
Адистер белгилегендей, айыл жергесиндеги турак жайды милдеттүү камсыздандыруунун максималдуу төлөмү - 500 миң сом. Ал эми шаарларда - 1 миллион сом.
Бардык учурларда чыгымдардын көз карандысыз баасы чыгарылат. Эгер зыян турак жай ээси тарабынан келтирилген болсо (адам фактору), камсыздандыруу төлөмдөрү каралбайт.
Кенжебек Кадырбаев ошондой эле камсыздандыруу тартиби мыйзам менен так жөнгө салынганын, кызматкерлер кардарга бардык керектүү маалыматты берүүгө милдеттүү экенин белгиледи.
Чүй филиалы декабрь айынан бүгүнкү күнгө чейин 75 камсыздандыруу төлөмдөрүн жүргүзгөн.
