Бишкек, 27.03.26. /Кабар/. Кыргызстан БУУнун Азык-түлүк жана айыл чарба уюмунун "Топурак доктору" аттуу глобалдык программасына расмий түрдө кошулду.
Суу ресурстары, айыл чарба жана кайра иштетүү өнөр жайы министрлигинен билдиришкендей, программа топурак ресурстарын туруктуу башкарууга жана алардын түшүмдүүлүгүн жогорулатууга багытталган.
Учурда Кыргызстандын тоолуу шартында жерлердин эрозиясы, деградациясы жана туздануусу курч маселе бойдон калууда. Программа бул терс көрүнүштөрдү алдын алууга көмөктөшөт.
Ошондой эле программанын алкагында 23-27-мартта Бишкекте биринчи окутуу тренинги өтүүдө. Ага Кыргыз дыйканчылык илимий-изилдөө институтунун адистери, агрономдор жана фермерлер катышууда. Катышуучулар топурактын түзүмүн баалоо, кычкылдуулук деңгээлин жана органикалык заттардын көлөмүн аныктоо ыкмаларын үйрөнүшүүдө.
Программа тажрыйбалуу адистердин алган билимдерин башка фермерлерге жайылтуу ыкмасына негизделген.
БУУнун Азык-түлүк жана айыл чарба уюмунун маалыматы боюнча, бул демилге айыл чарба продукциясынын сапатын жакшыртууга жана өлкөнүн агрардык секторунун узак мөөнөттүү туруктуулугун камсыз кылууга шарт түзөт.
