Бишкек, 12.03.25. /Кабар/. Транспорт министрлиги өлкөдө жасалып жаткан жол иштери боюнча маалымат берди.
Ведомстводон билдиришкендей, жаздын келиши менен аймактарда жолчулар тарабынан лотокторду жана жол четин тазалоо, кырып, тегиздөө, жол белгилерин алмаштыруу, куурап калган бак-дарактардын бутактарын кыркуу, тоо боорунан түшкөн таштарды тазалоо, мыйзамсыз курулуштарды демонтаждоо, аң-чөнөктөрдү толтуруу, асфальттоо сыңдуу жол иштери кызуу жүрүп жатат.
Алсак, Бишкек-Ош унаа жолунун 80-83-чакырымдар аралыгы менен Аламүдүн-Арашан-Кой-Таш жолунда (пропитка ыкмасы менен) аң-чөнөктөрдү жамоо иштери жүрүүдө. Ал эми Ош-Баткен-Раззаков жана Ош-Кара-Суу-Савай жолунун жээгине кум-шагыл аралашмасы төгүлүп, тегизделди. Кирпичный-Саруу-Жууку жолунда сүрүп, калыбына келтирүү жумуштары аткарылды. Бишкек-Нарын-Торугарт жана Жалал-Абад-Казарман жолдорунда эскилиги жеткен жол белгилери жаңыланды.
Ошондой эле инерттик материалдарды тазалоо, куурап калган бак-дарактардын бутактарын кыркуу, жол бетине түшкөн таштарды жана таштандыларды тазалоо иштери Ключевка-Май-Бакыян, Ош-Баткен-Раззаков, Дмитриевка-Кара-Алма, Бишкек-Нарын-Торугарт, Суусамыр-Талас-Тараз, Чоң-Арык-Ала-Арча жаратылыш паркы сыңдуу жети дубан жолдорунда жүрүүдө.
