Бишкек, 23.10.25. /Кабар/. Президенттин Жалал-Абад облусундагы өкүлү Тилек Текебаев Токтогул районуна болгон иш сапарынын алкагында бир катар социалдык объектилердин курулушу менен таанышты.
Өкүлчүлүктөн билдиришкендей, иш сапардын жүрүшүндө райондук оорукананын жана балдар үчүн реабилитациялык борбордун курулушунун абалы менен жеринде таанып, курулуш иштеринин сапатына өзгөчө көңүл бурууну тапшырды.
Азыркы учурда Токтогул райондук ооруканасы үч негизги корпустан турат — жугуштуу оорулар, балдар жана терапия бөлүмдөрү бир имаратта жайгашкан. Бул абал эпидемиологиялык жактан кооптуу болуп, санитардык талаптарга жооп бербей келет.
Жаңы курулуп жаткан имарат үч кабаттуу болуп, 100 керебетке ылайыкташтырылат жана заманбап медициналык кызмат көрсөтүү талаптарына жооп берет.
Ошондой эле оорукананын аймагында балдар үчүн өзүнчө реабилитациялык борбордун курулушу да башталган. Ага катар Токтогул шаарында 750 орундуу мектептин курулушун баштоо даярдыктары жүрүүдө.
Облус башчысы Тилек Текебаев курулуш иштерин жеринде көзөмөлдөп, сапат маселесин биринчи орунга коюу зарылдыгын белгиледи.
Башталган курулуштарды 2026-жылдын соңуна чейин бүткөрүү пландалууда.
Эске салсак, буга чейин министрлер Кабинетинин төрагасынын орун басары — УКМК төрагасы Камчыбек Ташиев райондогу саламаттык сактоо жана билим берүү мекемелеринин имаратын жаңылоо боюнча жергиликтүү бийлик жетекчилерине тапшырмаларды берген.
