Бишкек, 29.04.26. /Кабар/. Жогорку Кеңештин төрага Марлен Маматалиев Тогонун министрлер кеңешинин төрагасы Фор Эссозимна Гнассингбе менен жолукту. Бул тууралуу парламенттен билдиришти.
Жолугушууда тараптар эки өлкө ортосундагы алакаларды арттыруу боюнча ой бөлүшүп, парламенттер аралык кызматташтыкты өнүктүрүү тууралуу сөз кылышты.
Төрага Марлен Маматалиев алгач Фор Эссозимна Гнассингбе баштаган делегацияны эки күн мурун белгиленген Того Республикасынын Эгемендүүлүк күнү менен куттуктап, Кыргызстанга жасаган алгачкы тарыхый сапарына ийгиликтерди каалады.
"Бул сапар кыргыз-того кызматташтыгынын жаңы барагын ачып, эки элдин алакасын өнүктүрүүгө өбөлгө түзөт деген ишеничтебиз. Жетишилген келишимдерди ийгиликтүү ишке ашыруу үчүн парламенттер аралык өнөктөштүктү да өрчүтүп, депутаттык достук топторунун деңгээлинде да тыгыз иш алып барууга кызыкдарбыз", – деди төрага.
Ошону менен катар Кыргызстандагы соңку өзгөрүүлөргө да учкай токтолгон Марлен Маматалиев: "Сиз 2003-жылдары Тогонун Инфраструктура, тоо-кен, почта жана телекоммуникация министри болуп иштеп турган учуруңузда интернетти өнүктүрүүгө өзгөчө салым кошконуңузду билдим. Азыр биз дагы санариптештирүү саясатына өзгөчө көңүл буруп жатабыз. Андыктан, бул жаатта да тажрыйба алмашууга даярбыз", – деп кошумчалады.
Өз кезегинде Фор Эссозимна Гнассингбе эки өлкө ортосундагы алакалардын жаңы барагы ачылганын белгилеп, тогуз министр коштоп келген Кыргызстандагы иш сапары жемиштүү болуп жатканын билдирди.
Андан сырткары, Того мамлекети бир жарым жыл мурун парламенттик башкарууга өткөнүн маалымдап: "Андыктан, парламенттик дипломатия мамлекеттер аралык мамилелерде негизги ролду ойнойт. Биз кыргыз парламенти менен бардык багыттарда кызматташууга кызыкдарбыз", – деди.
Муну менен катар тараптар институттар аралык байланыштарды гана өнүктүрбөстөн жарандар ортосундагы тыгыз алаканы да калыптандыруу зарылчылыгына токтолду.
Андан соң төрага Марлен Маматалиев Фор Эссозимна Гнассингбе баштаган делегацияга Жогорку Кеңештин жыйындар залын көрсөтүп, парламенттин ишмердүүлүгү тууралуу кеңири маалымат берди.
