Бишкек, 29.06.26. /Кабар/. Казакстандын Жамбыл облусунун Тараз шаарында Кыргызстандын Ардактуу консулдугу ачылды. Бул тууралуу Тышкы иштер министрлигинен билдиришти.
Иш-чарага Кыргызстандын Алматы шаарындагы башкы консулу Жеңишбек Асанкулов, Тараз шаарынын акими Бакытжан Орынбеков, Талас шаардык кеңешинин төрагасы Алибий Жуманов, жаңы дайындалган ардактуу консул Жанузак Бейсеубаев жана эки өлкөнүн ишкерлери катышты.
Ачылыштын алкагында Талас жана Жамбыл облустарынын ишкерлеринин ортосунда соода-экономикалык байланыштарды кеңейтүүгө багытталган бизнес-жолугушуу уюштурулду.
Катышуучулар бул кеңсенин ачылышы кыргыз-казак мамилелерин чыңдоодо жана инвестициялык кызматташтыкты активдештирүүдө маанилүү кадам болорун белгилешти.
Жолугушуудан соң Талас облусунун делегациясы Жамбыл облусундагы «Dala Glass» айнек заводу, Кардиохирургия борбору жана тарыхый музейдин ишмердүүлүгү менен таанышты.
