Бишкек, 12.06.26. /Кабар/. Курулуш, архитектура жана турак жай-коммуналдык чарба министри Нурдан Орунтаев Талас шаарындагы К.Нуржанов атындагы борбордук аллеянын курулуш иштеринин жүрүшү менен таанышты.
Аталган долбоор шаарды көрктөндүрүүгө, тургундар үчүн ыңгайлуу жана заманбап эс алуу шарттарын түзүүгө багытталган. Учурда курулуш иштери белгиленген графикке ылайык активдүү жүргүзүлүүдө.
Долбоорго ылайык, аллея аймагында жарандар үчүн эс алуу зоналары, соода түйүндөрү, гүлдөрдүн галереялары, отургучтар, жөө жүрүүчүлөр үчүн ыңгайлуу жолдор, ошондой эле эне жана бала үчүн атайын бөлмөлөр каралган. Мындан тышкары, аймакты жарыктандыруу, көрктөндүрүү жана жашылдандыруу иштери да комплекстүү түрдө ишке ашырылат.
Бул объект ишке берилгенден кийин шаар тургундары жана коноктору үчүн заманбап коомдук мейкиндик түзүлөт.
